Aurat ko uska maqam kon dilaye ga??

 

Pichlay dino meri ankhoun k samnay se aik aesi khabar guzri jis nay mujhe ye sochnay pe majbor krdia k “KIA HA IS MASHRAY MEIN AIK AURAT KA MAQAM?” Woh khabar kuch ye thi k Baloch Colony ki rihaisha Sana k sath 3 larkoun ne mil kar ijtimai ziadti kari. Jis k natijay mein Sana  ne mashray mein apna woh maqam jo har aurat ka haq hota hai, kho chuki hai. Ub Sana jb tak zinda rhay gi aik be maqsad zindagi guzaray gi.Kion k humara mashra aj bhi aesi auart ko aik baizzat zindagi guzarnay ka koi haq nahi deta chahay woh aurat mazlooom hi kion na ho. Yahan per ye sawal paida hota hai k Kia qasor tha Sana ka ya mashray mein basi har us aurat ka jo zaidti jasay aziat naak amal ka shikar hoti hai?  Ya phir un aurtoun or larkioun ka jo bus stop per khari apni matlooba bus ka intizar krnay k sath sath mardoun ki isharay bazi or wahiat fikray bazi ka bhi samna kar rahi hoti hain, bebasi or majbori k alam mein. Kion k who janti hain k humaray is mardoun se bharay mashray mein uski awaz koi nahi sunay ga balkay uski awaz ko daba dia jaye ga ya usi ko morad e ilzam thehraya jaye ga. Ye waqiyat na tu farzi hain na hi jhot per mabni hain. Balkay in waqiyaat ne humari haqiqi zindagi se janam lia hai or her aurat ko sochnay per majbor kia hai k Kia hai is mashray mein humara maqam or hesiat? Sirf itni hi hesiat hai aurat ki mard k hathoun istimal hoti rahain ya mard ki buri nigahoun ka nishana banti rahain ya phir un k ghatiya jumloun ka samna karti rahain? In sab batou pe ghor karain tu humay ye andaza hota hai k humaray Allah or Rasool ne tu aurat ko uska maqam dia hai likin humaray mashray or mulk ne islami talimat se door ho kar aurat se uska who asal maqam cheen liya. Or is zalim dunia mein jeenay k liye ya izzat k sath rehne k liye mard k sath ka mohtaaj bana dia. Aurtoun k haq k liye larnay walay tu bht hain likin un ko unka asal maqam dilanay wala koi nahi.Is mulk or mashray mein har woh aurat tanha hai jis k sath mard ka sath nahi.Aj k is zamany mein jb insane jaan ki koi ahmiat nahi rahi wahin aurat ko bhi is cheez ka yaqeen nahi raha ka woh agar ghar se bahar niklay gi tu kia woh ba izzat ya baghair torcher hoye apnay ghar wapis asakay gi?

Oper bayan kiye gaye waqiyat or batain woh hain jin k hum adi ho chukay hain kion k ye batain kahin na kahin humari roz marra zindagi ka hissa ban chuki hain.Yani k agar tv per kisi aurat k sath hoi ziadati ya badtamezi ki khabar ati hai tu hum usay suntay hain dekhaty hain us pe tabsara krtay  hain or bhool jatay hain.Likin mera sochna ye hai k har azziat ka shikar sirf aurat hi kion hoti hai? Kia ALLAH tabarak o talah ne is liye hawa ki beti ko paida kia tha k unhay har mumkin tariqay se aziat pohunchai jaye, istimal kia jaye, nuqsan pohunchaya jaye or unhay is cheez ka ahsas dilaya jaye k ye hai tumhara maqam is mashray mein.

Aap, Mein or is blog ko parhnay wali har aurat kabhi na kabhi kahin na kahin aese aziat nak lamhoun ka shikar zaror hoi ho gi ya ho rahi hai.

Akhir mein mera sawal ye hai k, “Aurat ko is ka maqam kon dilaye ga? Koi dilaye gab hi ya nahi?